இசைப்புயலுக்கு இன்று பிறந்த நாள்... ரஜினி மற்றும் திரையுலகினர் வாழ்த்து

posted Jan 6, 2012, 7:51 AM by Sathiyaraj Thambiaiyah   [ updated Jan 6, 2012, 8:27 AM ]
இசைப்புயல் ஏ ஆர் ரஹ்மானுக்கு இன்று பிறந்த நாள். அவருக்கு சூப்பர் ஸ்டார் ரஜினி உள்பட தமிழ் திரையுலகினர் இன்று வாழ்த்து தெரிவித்தனர்.

ரோஜா படம் மூலம் இசையமைப்பாளராக அறிமுகமானவர் ஏ ஆர் ரஹ்மான். அதன் பிறகு ஜென்டில்மேன், பம்பாய் என அடுத்தடுத்த ஹிட் கொடுக்க, ரஹ்மானின் கேரியர் கிராப் எங்கேயோ போய்விட்டது. தமிழ் சினிமாவின் நம்பர் ஒன் இசையமைப்பாளராக உயர்ந்த அவர், பின்னர் இந்திக்கும் போனார்.

இந்தியில் மிகவும் வெற்றிகரமான இசையமைப்பாளர் என்ற புகழ் பெற்றார். அவர் இசையமைத்த இந்திப் படங்களின் பாடல்களை வெளியிடுவதில் இசை வெளியீட்டு நிறுவனங்கள் மத்தியில் ஏக போட்டி.


பின்னர் ஹாலிவுட்டிலும் கால்பதித்தார். ஸ்டீபன் ஸ்பீல்பர்க் படத்துக்கே இசையமைக்கும் அளவுக்கு முன்னேறியுள்ளார் ரஹ்மான்.

நான்கு முறை சிறந்த இசையமைப்பாளருக்கான தேசிய விருதினை வென்றுள்ள ஏ ஆர் ரஹ்மான், ஸ்லம்டாக் மில்லியனேர் என்ற ஆங்கிலப் படத்தில் இடம்பெற்ற ஜெய் ஹோ என்ற பாடலுக்காக ஆஸ்கர் விருதினை வென்றார். அதே படத்தின் இன்னொரு பாடலுக்கு பாடலாசிரியர் குல்சாருடன் இணைந்து மேலும் ஒரு ஆஸ்கர் விருதினைப் பெற்றார் ரஹ்மான்.

ரஹ்மானின் மனைவி பெயர் சாய்ரா. கதீஜா, ரஹ்மா என இரு மகள்களும், அமீன் என்ற ஆண் குழந்தையும் உள்ளனர். மகள் கதீஜா ஏற்கெனவே எந்திரன் படத்தில் புதிய மனிதா... பாடலை எஸ்பிபியுடன் பாடியுள்ளார். சிறுவன் அமீனும் பாடகராக அடியெடுத்து வைத்துள்ளான்.

பொதுவாக எந்த சர்ச்சையிலும் சிக்கிக்கொள்ளாதவர் ரஹ்மான். முதல் முறையாக முல்லைப் பெரியாறு விவகாரத்தில் தன்னையும் அறியாமல் சர்ச்சைக்கு உள்ளானார். முல்லைப் பெரியாறு அணையை உடைக்க வேண்டும் என்று கூறும் டேம் 999 படத்தின் இசைக்கு ஆஸ்கர் கிடைக்க பிரார்த்திப்பதாக அவர் கூறியதால் தமிழுணர்வாளர்கள் ரஹ்மானுக்கு கண்டனம் தெரிவித்தனர். ஆனால், இது பற்றி எதுவும் தெரியாத நிலையில் தாம் அப்படி பேட்டியளித்ததாகக் கூறி, வருத்தம் தெரிவித்தார் ரஹ்மான்.

இப்போது அவர் ரஜினியின் கோச்சடையான், ராணா, மணிரத்னத்தின் பூக்கடை ஆகிய படங்களுக்கு மட்டும் இசையமைத்து வருகிறார். இந்தி மற்றும் ஹாலிவுட் படங்களுக்கும் இசையமைத்து வருகிறார்.

பிறந்த நாள் காணும் அவருக்கு சூப்பர் ஸ்டார் ரஜினி காலையிலேயே போன் செய்து வாழ்த்து தெரிவித்தார். திரையுலகின் முன்னணி கலைஞர்கள் இயக்குநர்கள் ஷங்கர், மணிரத்னம், தயாரிப்பாளர்கள், நடிகர்கள் அனைவரும் அவரை வாழ்த்தினர்.

பிரபல இசையமைப்பாளர் யுவன் சங்கர் ராஜாவும் ரஹ்மானுக்கு வாழ்த்து தெரிவித்தார்.



இசைப்புயலுக்கு நமது வாழ்த்தையும் பதிவு செய்வோம்!